Thursday, January 17, 2019

ISRAEL GEBEDSTOER - STANDING WITH ISRAEL

   STAND WITH ISRAEL PRAYER TOUR 
      STAAN BY ISRAEL GEBEDSTOER

18-27 April 2020 @ R26 700 pp ($1=R14)
Hierdie toer word hoofsaaklik in Afrikaans aangebied deur die toerleier maar die toergidse op die bus is Engels asook is een van ons mede-leiers engels sprekend en dus kan engels sprekende persone wat bietjie Afrikaans verstaan ook saamkom. 


Kom saam met mede bidders, intersessors, profete, pastore, evangeliste, “worship” dansers, “prayer warriors”, en mede Christen gelowiges wat almal ‘n hart en passie vir Israel en die Joodse volk het, en kom seen Israel binne ISRAEL.  Hierdie is jou uitnodiging!  Maar ons het ongelukkig net plek vir ‘n totaal van 30 persone – moet dus nie langer wag nie en registreer dadelik.  Bring jul shofars, aanbiddingsvlae, tamboeryne en ander musiekinstrumente want ons gaan oorlogvoering voer in die geestesrealm.  Ons nooi profetiese dansgroepe uit om te kom dans op die grenslyne en reg deur Israel terwyl ons biddend verkeer.

Die wêreld haat Israel, kyk maar wat gaan in die internasionale nuus-kanale aan.  Israel word op elke gebied verdoem en die vyande van Israel wil hulle graag van die aardbol afvee.  Maar ek en jy wat kinders van die God van Israel is, weet dat Abba Vader sluimer of slaap beslis nie.  Hy waak oor Sy volk.  Hierdie klein landjie word van alle kante af onderdruk, ongelukkig selfs van ons eie land se regering ook.  Indien ons Israel seën sal ons ook geseënd wees. Daarom is dit my en jou plig om ernstig vir Israel in die bres te tree.  Ek heg vir jou verskeie dokumente by hierdie epos ook aan wat jou meer duidelikheid sal gee oor hoekom jy as Christen vir Israel moet bid.  Ek het ook ‘n tesis (in engels) oor dieselfde onderwerp wat jy kan aanvra per epos en ek stuur dit gratis vir jou.

Hierdie toer was ‘n opdrag van Abba Vader – Ons Christene moet gehoorsaam wees en in die “gap” vir Israel gaan staan.  Die minste wat ons as Koningskinders kan doen vir hulle is om vir hulle te bid.  Ons nooi jou dus saam om in daad en woord te gaan optree en fisies in Israel te gaan bid.  Wat ‘n beter plek is dit nie om juis in Israel, op hul grenslyne te gaan interses vir Israel se beskerming.  Hierdie landjie is maar so groot soos ons Kruger Nasionale Wildtuin.  Klein maar sterk want die God van Israel waak oor hulle.

Ons gaan al die grenslyne dek.  Ons gaan langs die Middelandse see by die Cesarea Akwaduks met ons voete in die water staan en vir die Westelike grenslyn van Israel bid. Daarna reis ons na Karmel Berg waar ons gaan uitkyk oor die Jisreel vallei.  Een van Israel se lugmagbasisse is in hierdie vallei (ondergronds) geleë.  Die F16 vliegtuie styg gereeld hier op.  Ons gaan dus intreë vir die lugmagbasis en weermag (IDF) van Israel. “Ramat David Israeli Air Force Base” is dus een van 3 hoof lugmagbasisse van Israel.  Bloedjonk Israeli soldate verloor baie keer hul lewens in diens van hul land.  Hierdie Jisreel vallei is ook bekend as die Megiddo vallei wat ‘n groot rol in die eintyd gaan speel nl. Armaggedon.

Daarna reis ons via Haifa na die Noordelike grenslyn tussen Israel en Libanon by Akko.  Ons gaan by die grenslyn bid asook die asemrowende Rosh Hanikra kalksteen grotte per kabelspoor besoek wat slegs meters van die grenslyn af is. Daarna neem ons ‘n  wandeling op die Ou Stad mure van Akko wat deur die markgedeeltes loop en ons ‘n geleentheid kry om die Ou-mark van Akko te besoek.  Akko is een van ‘n paar stede wereldwyd wat se mure steeds staan na duisende jare.  Dis gebou in 950nC deur Caliphate vir die stad se beskerming. Ons oornag  twee aande by die See van Galilea.

Ons reis dan Noordwaarts deur die Golan Hoogland na Kuneitra (by Mount Bental) waar ons ‘n pragtige uitsig na die Siriese grenslyn by Kuneitra asook oor die Golan Hoogland het.  Die Kuneitra vallei se naam beteken vallei van trane.  Mount Bental is ‘n ou weermag uitkyk pos met bunkers en ‘n fantastiese uitsig oor Siriê na die Ooste en die Hoogland na die Weste.  Hier het baie stryd en konflik tussen Jood en Arabier al plaasgevind en steeds is dit nog nie oor nie.  Hier is ook ‘n rigting aanwyser wat wys dat ons slegs 60km van Damaskus af staan.  Hierdie vallei was waar die bloedigste tenk gevegte gedurende die Yom Kippur oorlog in 1973 plaasgevind het en waar Israel met bitter min tenks (160) teenoor Sirië se oormag tenks (1500) teen alle verwagtinge die Siriërs oorwin het.  Ons dien ‘n Groot God wat Sy volk beskerm het, en vandag nog beskerm!

Ons besoek die asemrowende mooi Banias waterval en sien die pragtige natuurskoon van Noord Israel.  Hier by die oorsprong van die Jordaanrivier gaan ons bid vir Israel se watervoorsiening want hierdie rivier wat gevoed word deur strome en fonteine wat vanuit Berg Hermon kom, is die hoof bron van water vir die land Israel.  Water is Lewe.  Ons Messias het ook Lewende Water aangebied.

Terwyl ons reis gaan ons in die bus vir die dorpe, stede en kibbutse in die area in gebed tree.  By die Berg Predikasie langs die See van Galilea waar Jesus/Yeshua die bergrede gelewer het, gaan ons biddend verkeer en seëninge oor Israel spreek en mekaar seën.  Daarna maak ons ‘n draai by Mensa Kristi waar jy voete gaan natmaak in die see van Galilea voordat ons teen sononder ‘n bootvaart op die See van Galilea gaan onderneem waar ons weereens lof en aanbidding gaan bring asook Joodse danse gaan leer.

Ons reis deur die Jordaan vallei na Bethabara wat die oorspronklike doopplek van Jesus/Yeshua is by die Jordaan rivier.  Hier skei die Jordaanrivier die twee lande nl. Jordanië en Israel en gaan ons intreë vir die Oostelike grenslyn tussen hulle.  Daarna reis ons na die Berg Masada wat ons per kabelspoor gaan bereik en waar ons weereens ‘n lieflike uitsig oor die Negev woestyn, Dooie See en Jordanie het.  Hier gaan ons oor die Negev Woestyn na die rigting van die Egiptiese grenslyn intreë vir die Suidelike grenslyn van Israel. Daarna maak ons ‘n vinnige draai by Qumran en dan ‘n laatmiddag swem in die Dooie See voordat ons opry na Jerusalem.

Vir die volgende 4 dae in Jerusalem het ons nie meer die luukse toerbus beskikbaar nie en gaan ons per voet stap.  Ons maak egter van plaaslike vervoer gebruik soos die trein en lokale busse.  Alle plaaslike vervoer is vir jou eie sak.  In Jerusalem besoek ons die Olyfberg waar ons gebede oor Jerusalem stad gaan proklameer en gaan bid vir die Vrede van Jerusalem volgens die Psalm-opdrag, dan Getsemane tuin, Goue Poort, Lithostratos, bo-vertrek, Dawid graf, Kardo, Goue Menorah asook spandeer ons tyd in die Joodse kwartiere van die Ou stad.  Ons besoek ook die Westelike Muur (Kotel).   Ons blaas die shofars op die ou stad mure as Wagters op die Mure en proklameer gebede oor Israel en Jerusalem (bring dus jou shofar saam na Israel want ons blaas dit almal saam op die Ou Stad mure). 

Die laaste dag besoek ons die Dawid Stad en herontdek ons die Bybelse Jerusalem.  Ons besoek die ondergrondse argeologiese opgrawings asook stap ons die tonnel van Hiskia wat uitloop op die Siloam bad.  Hier is ook ‘n Herodian straat ondergronds wat loop tot naby die Westelike Muur.  Ons reis daarna na die Knesset (Israel se Parlementsgebou) waar ons gebede oor Israel se Regering asook hul Eerste Minister en sy kabinet spreek.  Daarna besoek ons die Holocaust Museum om in stilte aan die Joodse slagting van die 2de wêreldoorlog te dink voordat ons lughawe toe geneem word vir ons terugvlug na ‘n wonderlike en geesvervulde tyd in Israel.

  Ons hoor Vader se hartklop, en gaan baie kosbare tyd afstaan aan die Heilige Gees.  Hierdie toere is baie uniek in elke opsig en voldoen steeds aan hoë standaarde.  Ons vlieg ELAL (Israel se eie lugredery met die beste sekuriteit ter wêreld) en slaap in 'n goeie 3 ster hotel by die See van Galilea asook ‘n  4 ster hotel in Jerusalem in die hoofstraat wat binne bereik is van alles met daaglikse ontbyt en aandetes.  Ons kry ‘n luukse toerbus met ‘n toergids op die lughawe wat ons volgens die program tot in Jerusalem neem.  Die dae wat ons egter in Jerusalem spandeer is ons sonder die toerbus want alles is loopafstand van mekaar en ons maak gebruik ook van plaaslike vervoer wat goedkoper is.  God se opdrag was om ons fisies op die grond te kry en daarom beweeg ons per voet en kom so direk in aanraking met die plaaslike bevolking en hul kultuur.  Asook hoor ons die Heilige Gees se leiding met elke treë wat ons gee.

Ons het een dag opsy gesit om saam met ‘n Suid-Afrikaanse verteenwoordiger van Bridges for Peace Organisasie in Israel uit te gaan sodat ons blootstelling kan kry aan die diens en werk wat hulle vrywilliglik vir Israel lewer.  Ons kan dus die hande en voete vir Israel op grondvlak wees en ons omgee harte vir Israel wys asook die volunteers ontmoet wat van reg oor die wêreld in Israel gaan dien.  Hierdie toer is nie ‘n “ontvang” toer nie maar ‘n “gee” toer.  Ons gaan gee aan Israel.

Die dae wat ons in Jerusalem gaan spandeer maak ons gebruik van plaaslike vervoer en stap ons ook nogal baie – maak dus seker jy het gemaklike uitgeloopte stapskoene en dat jy wel sal kan stap (ongelukkig is die toer nie geskik vir mense wat moeilik loop nie agv die ruwe terrein en die feit dat ons baie kilometres per dag aflê per voet).  Ons het die betrokke dae in Jerusalem nie die toerbus tot ons beskikking nie en daarom maak ons dus gebruik van plaaslike/publieke vervoer wat vir elkeen se eie sak is – maak dus seker jy het genoeg kleingeld in shekkels (‘n enkel trein rit is ongeveer 6-7 shekkels).  Indien jy kyk na ons toerprogram sal jy sien dat die prys sluit basies alles in behalwe die plaaslike vervoer in Jerusalem self waarvoor jy self moet budget by jou sakgeld.

Ons hotel is ook gerieflik in die hoofstraat geleë en reg voor die hotel is 'n trem stop. Ons ry dan gewoonlik met die trein tot naby die ou stad en dan stap ons veder. Ons kry ook die een oggend ‘n plaaslike bus (vir jou eie sak +- 6 shekkels) naby Damaskus Poort om ons op te neem na die Olyfberg – ons stap egter die berg af deur die Kidron vallei en weer by die Ou stad binne.  Die Joodse mark (Shuk) is ook naby ons hotel geleë en na aandete besoek ons gewoonlik die mark en/of Ben Yehuda straatmall indien jy wil.  Die dag wat ons die tuingraf gaan besoek val op ‘n Saterdag wat die Joodse Shabbat is en geen vervoer beskikbaar is nie.  Daardie dag sal ons rustig stap van die hotel af tot by die Tuingraf.

Indien jy belangstel om saam te gaan, registreer so gou moontlik en stuur jou registrasie vorms en bewys van deposito betaling (van net R3000 om jou plek te verseker) na ons hoofkantoor van Menorah Toere (vir aandag Adri) wat in Kempton Park geleë is en copy my in op alles.  Ons ontvang reeds baie navraag en sal aanbeveel dat julle so gou moontlik bespreek indien jy sou belangstel.  Die res van die uitstaande bedrag na jou deposito betaal is, kan deur die jaar afbetaal word soos wat die Toeragentskap ook aan jou sal bevestig.  Dit gee baie mense kans wat wag op hul jaarlikse bonusse en ook deur die jaar wil spaar.  Jy kan egter ook maandeliks direk aan Menorah Toere afbetaal aan jou toerprys soos jy verkies – epos net altyd jou besonderhede en bewyse vir hulle).  Neem net kennis dat die toerleiers nie in diens is van die toeragentskap nie en dus nie self werk by die kantore van die agentskap nie.  Daarom sien ons nie die besprekings of gelde wat betaal word nie.  Slegs die agentskap hanteer alle finansies asook papierwerk.  Maar omdat hulle groot volumes registrasies ontvang van verskillende toere beveel ons sterk aan dat julle asb in alle eposse die toerleier sal incopy sodat hulle ook kan boekhou van jou bespreking.  Dit vergemaklik die taak aansienlik en die toerleier sal dan ook op hoogte wees.

Indien jy graag jou plekkie wil verseker stuur vir my jou registrasie vorm met deposito bewys na wagtersopdiemure@gmail.com.  Merk alle eposse in jou onderwerplyn wat jy aan my en die agentskap stuur met die volgende: 18 April 2020 Gebedstoer – Jou Naam en jou Van volg.

Israel het jou nodig!  Hoor die Vader Hart wat warm klop van liefde vir hierdie volk.  Dis my en jou as wedergebore Christen se plig om vir God se land en volk te bid.  As dit swaar op jou hart lê, kom saam en kom maak ‘n verskil in die geestesrealm want hierdie is ‘n oorlog in die lug, teen die bose magte wat Israel wil vernietig.  Ons het die Heilige Gees in ons en ons kan ‘n verskil maak!

As jy 'n roering in jou hart voel, bid hieroor en boek op hierdie reis wat werklik 'n afspraak met ons Hemelse Vader is. Ons weet dat vir elkeen wag daar 'n spesiale afspraak met Vader, met 'n spesiale salwing in Israel.  Hierdie toer is nie die agent of toerleiers se toer nie, dit is ABBA VADER sin!  Ons is anders, ons gaan fyn luister na Vader se Stem en saam met Hom deur Israel beweeg terwyl ons oor op die grond is en ons oorlogvoering gaan doen vir Israel.   God is besig om intersessors op te wek vir Israel (Jes 62:6-7).  Ons moet as Wagters op die Mure ons plek vir Israel inneem. Abba Vader is besig om in ‘n tyd soos nou die harte en oë van gelowiges oop te maak sodat hulle Sy Hartklop vir Israel kan ervaar.

Moet dus nie langer huiwer nie, tref vandag nog reëlings met ons!

EPOS vir Program en Registrasie vorm: 
wagtersopdiemure@gmail.com

Jesaja 62:1
Ter wille van Sion sal ek nie swyg nie, en ter wille van Jerusalem nie stil wees nie!

JERUSALEM 10 DAG TOER 30 NOV - 9 DES 2019


JERUSALEM 10 DAG TOER
30 November – 9 Desember 2019
 R21 800 pp ($1=R14)



Baie mense veral pastore, bedienaars, intersessors en ander mense wat alreeds voorheen Israel besoek het, het ‘n diepe verlange in hul binneste om net tyd in Jerusalem in Abba Vader se Teenwoordigheid te gaan spandeer sonder die gejaagdheid van ‘n toerprogram wat gevolg moet word.  Vir baie is dit frustrasie om self ‘n privaat reis na Israel te beplan en ook werk dit in meeste gevalle baie duur uit.  Daarom het ons ‘n Jerusalem toer saamgestel wat al die logistieke reelings in die hande van ‘n bekwame toeragentskap laat sodat jy kan ontspan en in die veiligheid van ‘n groepsverband Jerusalem kan gaan besoek en tyd spandeer soos jy wil.

Die Jerusalem toer is uitgewerk sodat basies alles ingesluit is vir jou.  Ons vlieg ELAL en oornag in Jerusalem in ‘n goeie 4 ster hotel in die hoofstraat van Jerusalem waar plaaslike vervoer op die hotel se voorstoep is.  Die dae in Jerusalem is vir elkeen se eie gebruik en kan jy self beplan hoe en waar jy jou tyd wil gaan spandeer.  Ons slaap as groep in dieselfde hotel en daar is ook 2 groot etes (ontbyt en aandetes) ingesluit.  Vervoer in Jerusalem is vir jou eie sak asook alle besoeke.  Alle besoeke en besigtings in Jerusalem in jou afdae is vir jou eie sak.  Die toerprogram sluit wel op die eerste dag en laaste dag in Israel ‘n program in waar ons plekke gaan besoek wat reeds by jou toerprys ingesluit is.  Die luukse toerbus sal ons dan ook weer op die lughawe terugbesorg. Al wat jy dus benodig is sakgeld vir Jerusalem vir dit wat jy beplan om te gaan doen.  Daar is baie plekke in en om die ou stad wat jy per voet kan besoek. Party plekke is gratis en ander vra weer toegangsfooie.  Google gerus die plekke vooraf wat jy wil besoek en doen jou beplanning.  Daar is ook kort dag toere wat in en om Jerusalem aangebied word asook na ander plekke en jy kan dit vooraf google maar al die inligting is ook by Jaffa Poort se inlingting sentrum te verkry. Reg voor ons hotel is ‘n trein wat ons gewoonlik neem tot by Jaffa Poort en dan stap jy veder.  ‘n Enkel treinrit kos ongeveer 7 shekkels.  Jy kan ook in die aande Ben Yehuda straat en die shuk (Joodse mark) gaan besoek wat loopafstand is van die hotel.

Die Jerusalem Toer is juis bedoel vir diegene wat privaat tyd in Jerusalem wil gaan spandeer om Vader se Hartklop en Stem te hoor. Enige een is Welkom, solank jy onthou daar is geen vasgestelde program vir die tydperk in Jerusalem nie en jy moet self kan oor die weg kom (wat redelik maklik is en wat jy gou gaan baasraak).

Epos vir volledige program en registrasie vorm: wagtersopdiemure@gmail.com / betshalomzv@gmail.com

BOEK SO GOU MOONTLIK WANT HIERDIE TOER IS BAIE GEWILD!!


Wednesday, November 21, 2018

10 Dag Vroue Gebedstoer na Israel in 2020



ISRAEL GEBEDSTOER


PROFETIESE VROUE BEDIENINGS TOER


1-10 FEBRUARIE 2020 @ R25 500 pp ($1=R14)


Shalom mede Pelgrim
 
Kom raak Sy kleed aan in Israel. Hierdie Israel Gebedstoer vir 2020 is spesifiek gerig op vroue bediening en die bekende pastoors paartjie, Pastore François en René van den Bergh van Crossroad Ministries gaan die dames profeties bedien op hierdie gebedstoer met profetiese aksies.  Jy wil dit beslis nie mis nie!  Francois en René bedien gereeld op vrouekampe regoor SA. Hierdie is ‘n gebedstoer wat jaarliks plaasvind en saam met Francois en René gaan ek julle deur Israel begelei en gaan ons fyn luister na die Heilige Gees se Stem.


Jesus soek jou by Sy voete my sussie.... Hy soek jou by die put...... Hy soek jou oorgawe en trane wat warm drup op Sy voete wat deurboor is vir JOU!  Kom reis saam met ons na Israel en kom ervaar Sy soom by Magdala waar dit ‘n spesiale plek is vir vroue en Jesus baie deernis met vroue getoon het, kom ervaar hoe die Heilige Gees oor jou spoel by die bo-vertrek, kom soek Sy aangesig op die ondergrondse plaveisel (Lithostratos) waar Sy kosbare Bloed gevloei het, kom ervaar die Nasaret Village wat jou terugneem na die Bybelse tydperk en jy die hartklop van Bybelse vroue kan ervaar, kom drink (letterlik) van die Lewende water by die put van Jakob in Samaria, kom vaar op die See van Galilea en luister na Sy Stem in die wind en golwe, kom sien vir jouself dat die graf leeg is en kom gee jouself in volle oorgawe oor aan Hom. Hy verlang na jou..... dis tyd .....  kom soek Sy Hartklop in Israel!  Hierdie is 'n uitnodiging aan elke kosbare vrou in Suid-Afrika.

Die Gebedstoer het ontstaan as gevolg van 'n dringendheid na gebed vir Israel nadat ek reeds al verskeie kere Israel besoek het in die verlede en met verskeie toergroepe na Israel gereis het.  Vader het nie net meer gewone toere na Israel gesoek nie, Hy soek die harte van mense in Israel!  Abba Vader het ons dus opdrag gegee om in Israel, vir Israel te gaan bid.  Israel is steeds Sy kosbare oogappel en Vader het ons nodig om te gaan intreë vir hierdie volk en daarom maak ek mense/kerke bewus daarvan om elke dag vir Israel te bid.  Ons bid nie net vir Israel nie maar bedien ook vir mekaar op hierdie toer.  Ons bid soos die Heilige Gees ons lei want hierdie is ‘n gebedstoer.  Daarom neem ons sedert 2016 jaarliks in Februarie maand gebedstoere na Israel in opdrag van God – ‘n opdrag wat Vader reeds in 2014 in my hart kom gee het.


Februarie maand is egter die ideale tyd want alhoewel dit tegnies nog 'n wintermaand in Israel is, is dit reeds aan die einde van hul winter en is meeste dae baie matig.  Die aande veral in Jerusalem kan nogal koud wees maar die dae is heerlik en daarom kan ons vêr stap want dis nie te warm of te koud nie.  Soms kan dit ook effense reënweer wees maar dit het ons nog nooit gestuit nie (onthou dus jou sambreel).  Boonop is die klimaat by die Dooie See en veral by Betabara waar ons doop steeds lekker matig en kan ons vorige toergroepe getuig daarvan dat dit heerlik was om te swem (of eerder te dryf in die Dooie See).  Februarie is ook steeds 'n lae seisoen maand en daarom hou ons die kostes so laag as moontlik omdat ons dit finansieël sovêr moontlik wil maak vir baie gelowiges om Vader se Hart te gaan hoor.  Hierdie gebedstoer gaan nie net om 'n lekker vakansie, of enige ander rede nie, maar suiwer om God se opdrag om te gaan bid, uit te voer.  Natuurlik sien jy, en ervaar jy baie meer ook en is daar geleenthede vir inkopies, ens.  Maar ons primêre fokus is Gebed en soeke na Vader se Hartklop. Ons laat die Heilige Gees toe om ons te lei regdeur elke dag en tree wat ons gee.
 
Hierdie gebedstoere is baie uniek in elke opsig en voldoen steeds aan hoë standaarde.  Ons vlieg ELAL (Israel se eie lugredery met die beste sekuriteit ter wereld) en slaap in 'n 4 ster hotel in Jerusalem in die hoofstraat wat binne bereik is van alles met daaglikse ontbyt en aandetes.  Ons kry ‘n luukse toerbus met ‘n engelssprekende toergids op die lughawe wat ons volgens die program tot in Jerusalem neem.  Die dae wat ons egter in Jerusalem spandeer is ons sonder die toerbus want alles is loopafstand van mekaar en ons maak gebruik ook van plaaslike vervoer wat goedkoper is (en vir jou eie sak is).  Ons onttrek dus die toerbus in Jerusalem. God se opdrag was om ons gebedsgroep fisies op die grond te kry en daarom beweeg ons per voet en kom so direk in aanraking met die plaaslike bevolking en hul kultuur.  Asook hoor ons die Heilige Gees se leiding met elke tree wat ons gee.  Hierdie toer is 'n toer nader aan Abba Vader se Hart. Kom saam my liewe sussie, kom ervaar Jesus in Israel wat jou lewe beslis gaan verander.


Op die lughawe nadat ons geland het kry ons ‘n toerbus met ‘n Israelse toergids wat ons volgens die program eers na die See van Galilea en Dooie See areas neem en dan tot in Jerusalem waar ons dan vir 4 dae sonder ‘n toerbus sal wees en van plaaslike vervoer asook baie stap sal gebruik maak.

 Mense wat dus wil saam toer moet kan stap sonder moeite want ons stap baie en die terrein is ongelyk met trappe, opdraandes en afdraandes en ons kan dus nie die groep ophou nie (sorg dus vir gemaklike uitgeloopte skoene). Ons kry egter weer die toerbus met gids die laaste dag, wat ons dan na verskeie plekke neem soos op die program aangedui is voordat ons weer ons terugvlug haal huistoe.  (Ons het die betrokke dae in Jerusalem nie die toerbus tot ons beskikking nie en daarom maak ons dus gebruik van plaaslike/publieke vervoer wat vir elkeen se eie sak is – maak dus seker jy het genoeg kleingeld in shekkels (‘n enkel trein rit is ongeveer 6-7 shekkels).  Indien jy kyk na ons toerprogram sal jy sien dat die toerprys sluit basies alles in behalwe die plaaslike vervoer in Jerusalem waarvoor jy self moet budget by jou sakgeld. Ons beveel dus egter aan dat toerlede ook kontant in Israeli Shekel sal aanvra en saamneem na Israel.  Baie plekke in veral Jerusalem werk net met Shekels en die trein werk slegs met kontant (geen kaarte).  Jy is steeds welkom om jou bankkaarte saam te neem maar fisiese kontant in Israeli Shekel word hoogs aanbeveel.  Jy kan US Dollars ook neem maar sorg dat jy ook Israeli Shekels het in jou beursie.)

Dr Zetta sal in beheer van die toer wees en die toer ook op grondvlak self deur Jerusalem se strate lei na al die plekkies wat ons gaan besoek.  Deel van die gebedstoer en opdrag wat sy ontvang het is om jaarliks gebede oor Jerusalem en Israel te proklameer vanaf die Ou stad mure.  Daarna  blaas ons die shofars oor Israel (bring dus jou shofar saam na Israel want ons blaas dit almal saam op die Ou Stad mure). 
 

 Ons hotel is ook gerieflik in die hoofstraat van Jerusalem geleë en reg voor die hotel is 'n trem stop. Ons ry dan gewoonlik met die trein tot naby die ou stad en dan stap ons veder. Ons kry ook die een oggend ‘n plaaslike bus (vir jou eie sak ook) naby Damaskus Poort om ons op te neem na die Olyfberg – ons stap egter die berg af deur die Kidron vallei en weer by die Ou stad binne.  Die Joodse mark (Shuk) is ook naby ons hotel geleë en na aandete besoek ons gewoonlik die mark en/of Ben Yehuda straatmall indien jy wil.  Die Saterdag is ons “vrye” dag en kan jy self besluit wat jy vir die dag wil doen.  Dis egter Shabbat en alle plaaslike vervoer en winkels aan die Joodse kant kom tot stilstand, dus moet jy bereid wees om te stap.  Die arabiese gedeeltes in die ou stad is egter steeds oop op ‘n saterdag en jy is welkom om daar te gaan rondstap of inkopies te gaan doen.  Die tuingraf is ook oop op ‘n Saterdag en jy is ook welkom om stilletyd onder die bome in die tuingraf te gaan spandeer.  Toegang by die tuingraf kos niks.

Hierdie toer het beperkte plekke wat hoogs in aanvraag is en registrasies stroom reeds in.  Die toerprys is bekostigbaar gemaak en boonop kan jy reg deur die jaar afbetaal wat jou kans gee om jou beplanning te doen.  Indien jy belangstel om saam te gaan, registreer so gou moontlik en stuur jou registrasie vorms en bewys van deposito betaling van net R3000 om jou plek te verseker na die hoofkantoor van Menorah Toere (vir aandag Adri) en copy my in op alles.  Ons ontvang reeds baie navraag en sal aanbeveel dat julle so gou moontlik bespreek.  Die res van die uitstaande bedrag na jou deposito betaal is, kan deur die jaar afbetaal word soos wat die Toeragentskap ook aan jou sal bevestig.  Menorah Toere ontvang en hanteer dus alle finansies en logistieke reelings rondom die toer.  Indien jy wil navraag doen oor jou betalings ens. rig dit direk aan die agentskap maar copy my altyd in op al jou eposse. 


 Kom saam met ‘n groep dames en kom ervaar die land Israel in al sy fasette.  Kom en wees gehoorsaam en laat Jesus jou kruik volmaak.  Jesus het ‘n deernis met vroue, Hy wil jou aanraak.  As jy in jou hart ‘n roering voel, bid hieroor en boek vandag nog op hierdie geestelike reis wat werklik ‘n afspraak met ons Hemelse Vader is.  Ons weet dat vir elkeen wag daar 'n spesiale afspraak met Vader, met 'n spesiale salwing in Israel.  Hierdie toer is nie die agent of leiers se toer nie, dit is ABBA VADER sin!  Ons is anders, ons gaan fyn luister na Vader se Stem en saam met Hom deur Israel beweeg.  As Vader jou hart roer, kom saam en kom soek Sy aangesig in Israel saam met ons waar ons ook letterlik as Wagters op die mure van Jerusalem loop en die shofars blaas want ons Koning se koms is so bitter naby.

Moet dus nie langer huiwer nie, tref vandag nog reëlings met ons!
 Kom los jou voetspore agter in Israel & kom soek Abba Vader se Hartklop..

Kry jou by Jesus se voete in Israel!


-Shalom Zetta-

---------------------

Bring jou shofar, tamboeryn en aanbiddings vlae saam!


SEE YOU IN JERUSALEM!!